Benvida do presidente
Benvidas e benvidos ao portal web da Federación Galega de Baloncesto.
Asumido o compromiso da Xunta Directiva que presido por coñecer de cerca os problemas do baloncesto en Galicia e avanzar cara ao establecemento dunha estratexia de sustentabilidade para a FGB, práceme presentarche esta ferramenta de comunicación bidireccional que nos permitirá desenvolver todo o potencial do baloncesto galego, tanto como deporte como a través do seu importante labor social.
A Federación renóvase por dentro e por fóra, e faino nun ano especial para todos os que formamos e formaron parte desta institución: neste 2008 cúmprense 25 anos do nacemento da Federación Galega de Baloncesto.
Para afrontarmos con garantías o novo reto, partimos dun proceso sólido e fundamentado de revisión identitaria, que establece un marco de coherencia para os importantes pasos que é preciso dar para levar o baloncesto galego ao nivel dos seus tempos.
Esta nova ferramenta aspira a se converter no espazo de relación dos deportistas, seareiros, adestradores e colexiados para que se poidan poñer en común experiencias, inquedanzas e preocupacións que contribúan a xerar unha comunidade virtual arredor do deporte do baloncesto en Galicia.
Grazas por seguir a xogar connosco.
Francisco Martín Micó
Presidente da Federación Galega de Baloncesto
